E Ola Ka ʻŌlelo Hawaiʻi
Ua hoʻokumu ʻia ka ʻAha Pūnana Leo i ka makahiki 1983 no ka hoʻōla ʻana i ka ʻōlelo Hawaiʻi. I kēia manawa, ua lilo ka hana hoʻōla ʻōlelo Hawaiʻi a ka ʻAha Pūnana Leo i kumu hoʻohālike no ko Hawaiʻi, no nā ʻōiwi o ʻAmelika Hui Pū ʻIa, a no nā ʻōiwi a puni ka honua. I loko o nākekeke i hala aku nei, ua hoʻokumu a hoʻomohala ka ʻAha Pūnana Leo i nā papahana ma ka paeʻāina ʻo Hawaiʻi, ua kinai i ke kānāwai e pāpā ana i ke aʻo ma o ka ʻōlelo Hawaiʻi ma nā kula aupuni a kūʻokoʻa no 90 makahiki, a ua ʻauamoea hoʻi ka ʻAha Pūnana Leo no nā lāhui ʻōiwi ʻē aʻe e ulu ai ka ʻike no ke koʻikoʻi o ka ʻōlelo a me ka moʻomeheu ʻōiwi.
Ka Nuʻukia
E Ola Ka ʻŌlelo Hawaiʻi.
Ke Ala Nuʻukia
E hoʻoulu i ke kaiaʻōlelo Hawaiʻi no ko Hawaiʻi nei i mau aku ʻo Hawaiʻi he ʻāina Aloha.
.
Ka Manaʻo Hoʻokele
He mea nui ke Aloha
Ola kēia aloha i loko o ke aloha akua, aloha ʻōlelo, aloha lāhui, aloha ʻāina a me ke aloha naʻauao.
He mea nui ka ʻOhana
Kōkua a kākoʻo i ka ʻohana holoʻokoʻa e ola ai ka Nuʻukia.
He mea nui ke Kuleana
ʻO ka ʻauamo kuleana ka mea e pono ai no ka hana a kō, ka hana maiau a me ka noke i ka hana.
He mea nui ka Naʻauao
Hoʻonohonoho ʻia nā ala hoʻonaʻauao mauli ola Hawaiʻi no ka ʻohana Pūnana Leo holoʻokoʻa.
Kumu Honua Mauli Ola
ʻO Ke Kumu Honua Mauli Ola, ua hoʻopaʻa palapala ʻia i ka makahiki 1998 ma lalo o kekahi kōmike i kākoʻo ʻia e ka ʻAha Pūnana Leo ma ke aʻoaʻo ʻana mai a Keiki Kawaiʻaeʻa, Kalani Akana a me Makalapua Alencastre.
I ia manawa ua ʻike ʻia he mea nui ka hoʻopaʻa ʻia o ke ʻano o ka paepae noʻonoʻo i puka mai ai nā kula Pūnana Leo a mai ia mau kula aku, nā Kula Kaiapuni Hawaiʻi, a mai ia pae aʻe nā Kula Hoʻāmana Hawaiʻi. ʻO ka mauli, ua like maoli nō ia me ke ahi e ʻā ana i loko o kākou, a ke pio ʻo ia , pio pū ke ola o ko kākou Hawaiʻi ʻana. I mea hoʻi kēia kumu honua mauli ola e hiki ai iā kākou ke hōʻike i ke ʻano o ia mauli i loko o ko kākou naʻau a noʻonoʻo a i hiki hoʻi ke lōkahi ma ke kūpaʻa ʻana ma hope o ia mea. Ke kahukahu nei hoʻi kākou i ia ahi he mauli Hawaiʻi, e ʻoiaʻiʻo ai ka Hawaiʻi ʻana o kākou ma ke ʻano he kino kanaka kāʻokoʻa a ma ke ʻano he lāhui kekahi.
Nā ʻaoʻao o ka mauli o ke kanaka:
Ka ʻAoʻao Pili ʻUhane
Ka ʻAoʻao ʻŌlelo
Ka ʻAoʻao Lawena
Ka ʻAoʻao ʻIke Kuʻuna
ʻAʻole ka mauli Hawaiʻi o ke kono kanaka kāʻokoʻa, he mea kuewa wale, akā, he mea noho Honua paʻa ia. Alakaʻi ʻia ka ʻAha Punana Leo e ke Kumu Honua Mauli Ola i ka hoʻokumu honua mau no ke ola o ka Mauli Ola Hawaiʻi.
E hoʻoili ʻia he kope o ka mana .pdf o ke Kumu Honua Mauli Ola ma ʻaneʻi.
A i ʻole hiki ke kūʻai i kope kino paʻa mai ka Hale Kuamoʻo mai ma ka helu 808-932-7430
Ka Hāʻawi Manawaleʻa
E hāʻawi manawaleʻa ma ka pūnaewele. E hoʻopihapiha i ka palapala a e kaomi i ke pihi no ka hoʻouna i kāu lūlū. ʻIke ka ʻAha Pūnana Leo he nui nā kumu a me nā makakoho e hoʻokele ana i ka hāʻawi manawaleʻa ʻana. Kākoʻo aku mākou i nā ʻano like ʻole e hāʻawi manawaleʻa aku ai, a e hoʻohana ʻia aku kāu haʻawina manawaleʻa e like me ke kuhikuhi ʻia mai.
Ka Moʻolelo Makahiki
He huakaʻi kupaianaha ko kēlā me kēia makahiki. Mahalo a nui i ko kākou kaiaulu ʻAha Pūnana Leo no ke kākoʻo a kūpaʻa mau. E ʻoluʻolu e kiʻi ʻia ka moʻolelo kūmakahiki i ʻaneʻi.
